Ma bouche rit

Ma bouche rit et ma pensée pleure,

Mon oeil s’esjoye et mon cueur mauldit l’eure

Qu’il eut le bien qui sa santé deschasse

Et le plaisir que la mort me pourchasse

Sans resconfort qui m’aide ne sequeure.

Ha, cueur pervers, faulsaire et mensonger,

Dictes comment avez osé songer

Que de faulser ce que m’avez promis.

Puis qu’en ce point vous vous voulez venger,

Pensez bien tost de ma vie abreger;

Vivre ne puis au point ou m’avez mis.

Vostre rigueur veult doncques que je meure,

Mais Pitié veult que vivant je demeure;

Ainsi meurs vif et en vivant trespasse,

Mais pour celer le mal qui ne se passe

Et pour couvrir le dueil ou je labeure,

Ma bouche ritet ma pensée pleure,

Mon oeil s’esjoye et mon cueur mauldit l’eure

Qu’il eut le bien qui sa santé deschasse

Et le plaisir que la mort me pourchasse

Sans resconfort qui m’aide ne sequeure.